جستجو
araztak
aytak
almas
turkdonar
jamshidi
diyamond
sida
sismoni
shanay
alyari
urumkaneks
lutus
monlayt
hunday
حجامت

تاريخ انتشار : 92/11/02 - 16:20
هدیه‌‌لر دانیشاندا...
هدیه‌‌لر دانیشاندا...

هئچ اولوبمو آلدیغیز هدیه‌نین پارلاق رنگلی کاغیذینی آچاندا شیخ –شیخ سسلرینه قولاق آسیب نه دئدییینی ائشیده‌سیز؟ دوغوم گونو هدیه‌سی ، تزه ائو گؤروشو ، آنالار گونو ،ائولیلیک ایل دؤنومو یا سون ایللرده مود اولان سئوگیلیلر (ولنتاین) گونو هدیه‌سی کیمی .

بیری دئییر" دونیایا گلیشینه سوینیرم" بیری دئییر" تزه ائوینده ساغ ،دیلخوش گونلرین اولسون"

بیری دئییر"سنه میننت دارام"  اوبیری دئییر" سنی سئویرم". بو هدیه‌لر قارشیلیقلیدیر.یانی بیر گون بیریندن آلاریق باشقا بیر گون ده عوضین آلیب قایتاراریق.بیزی سئویندیره‌نلری بیزده سئویندیره‌ریک.

آما بعضی هدیه‌لرین نه دئدیینی آنلاماق تکجه اونا بوکولن، اونو بزه‌ین کاغیذین خیش -خیشینا قولاق آسماقلا اولمور.آخی  ایچلرینده بیر دونیا سؤز ساو واردیر! تاریخین اوزاق دیارلاریندان گلیب الیمیزه چاتان بو هدیه‌لر هردن ائله آغیر مئساژلارین قاصیدی دیرلر کی اونلاری الیمیزه آلیب گؤزوموزو گؤزونه تیکیب اوزون اوزون دینله‌مه‌لییک.

کئچن گونلرده او سؤز ساولی هدیه‌لردن بیرینین شنلییی وارییدی. چیلله آخشامیندا نیشانلی قیزلار ،تزه گلینلر حتتا شانسلی! ساییلان آهیللیق یاشیندا اولان خانیملارین چوخو چیلله پایی آلدیلار.

او گون صوبحدن گؤزلر یولا تیکیلدی ، قولاقلار سسده اولدو. بیریسی آداخلیسینین یولون بیریسی آتاسینین ،قارداشینین یولون گؤزله‌دی . ماددی دیرینه باخمایاراق سئویلیب ساییلمانین دادینی وئرن چیلله پایی ،خانیملارین الینه گلیب چاتدیقدا سیزجه نه لر دئدی ؟

" چیللن موبارک! قارانلیغین ان چوخ عؤمور سوردویو بو سویوق قیش گئجه‌سینده اوره‌یین آیدین ،ایستی،دینج اولسون.سنی سئون نیشانلین،آتان،قارداشین آرخاندا.کیمسه سنه یان گؤزله باخانماز.

کیمسه سنی اینجیده‌نمز.قوروما آلتینداسان.هئچ قیتلیین ،چتینلیین اولمایاجاق  .آرخایین اول !"

گؤره‌سن قادین کیمدن قورونمالیدیر؟! نیه قارشی حیمایت اولونمالیدیر؟! ائشیکد‌ن می تهدید اولونور؟ یوخسا ائوین ایچیند‌ن می ؟

یادا داها یاخین بیر یئردن ،اونون اؤز ایچیند‌ن می ؟ عاییله‌ لر قیز اوشاغینی هله آنادان اولمادان ضعیف ،ایکینجی جینس گؤرمه‌سه‌لرسه،دونیایا آیاق قویان گوندن بری اوغلان اوشاغیندان آشاغی سویه‌ده توتماسالارسا ، اونا گوج وئرمک یئرینه  حیمایه دیله‌نمه‌یی اؤیرتمه‌سه‌لرسه ،اوندا اؤز گوو‌ن یارادیب اوغلان اوشاقلارینا ائله‌دیکلری کیمی اؤز آیاغینین اوستونده دورماق ایمکانی وئرمک یئرینه ،اؤز تایی اینسانلارین اولوشدوردوغو ایجتیمادان قورخوداراق ایطاعت‌کاراولماغا عادت وئرمه‌سه‌لرسه...قادین بو قدر کؤورک ،بو قدر اورکک اولارمی ؟!

اینسان اؤز بیلییی ایله یاشامایا باشلامادان نه اولاجاغی ،هانسی اینسانی اؤزه ‌للیکلری اولاجاغی بللی اولماز.اؤزدوشونجه‌سیله اؤز سئچیمییله حیاتینی قورمادان نئجه بیر کاراکتر اولاجاغی بیلینمز.کیمسه‌نین گله‌جه‌یی آنلیندا یادا باشقا بیر یئرده یازیلی دییلدیر.اینسان گله‌جه‌یینی اؤزو یاراتمالیدیر.آنجاق بیرینین اینسانی حاقلاری هله وارلیق تاپمادان الیندن آلیندییسا،یئته‌نکلرینی* کشف و ایفاده ائتمک ایمکانی قیسیدلاندییسا ، یاشامینین ایلک گونوندن ضعیف اولدوغونا ایناندیریلیبسا ،اونون کامیل بیریسی اولمایاجاغی آچیق آیدیندیر.قورونمایا ائحتیاج دویاجاغی بللی دیر.

جینسیت آیریمی اساسیندا و قارشیلیقسیز شکیلده وئریلن چیلله پایی ،چارشنبه پایی، اولارلا یاناشی تزه عصرین مودو اولان قادینلار گونو کادوسو کیمی هدیه‌لر، گؤرونوشده محبت ،سئوگی ،قدرشوناسلیق حیسسلرینی داشیسالاردا درینلیکلرینده آپ-آیری مئساژلاری وار."سن عزیزسن ،سئومه‌لیسن،وارلیغین بیزه دینچلیک وئرمک اوچون لازیمدیر.محبتلرینه میننت داریق .

قدرینی بیلیریک.سنی قورویاجاییق.صاحاب چیخاجاییق...آما خاطیریندن  چیخماسین سن بیزدن دییلسن.آشاغیداسان .بیزه مؤحتاجسان.شوعورون بیزدن آزدیر.باجاریلارین بیزدن آزدیر.بیز ارکک اولاراق ،گوجلو اولاراق ،اوستون اولاراق ایلین عزیز گونلرینده سنی یادا سالیب اؤز دونیامیزدان سنه‌ده پای  وئریریک "

آجیدیر هن؟ دئیه‌سن چیلله گئجه‌سینین توم گؤزه‌لیینی پوزدوم . بیلیرم .بیزلر آچیق سؤزلرله چوخ آرامیز یوخدور.خوشوموز گلیر آجی ،ایتی سؤزلری گؤزل گؤیچک جومله‌لرله بزه‌ییب دانیشاق .یا دا کؤهدن مسئله‌نین اوزون سیلیب اؤزوموزه باش آغری وئرمه‌یک.

امینم منیم چیلله گئجه سی کیمی گؤزل و دیرلی دبلریمیزی آشاغیلاییب پیسله‌مک ایسته‌مه‌دییمی بیلیرسیز .سؤزومون جانی، اینسانلار آراسیندا آیری سئچکیلیه اعتراض ائتمکدیر.آیری سئچکیلیک تکجه تحصیل ایمکانی ،ایش ایمکانی ،حوقوق ،ایقتیصاد کیمی گؤزه بؤیوک گؤرونن قونولاردا دییل.

بو عاریضه نین تملی ائولریمیزده تیکیلیر.بوگون کیچیک قیزیمیزی یاریم اینسان گؤرورسک صاباح اونو نیسگیللی باخیشلارلا یولا سالاجاییق.بیرینی بوتون اینسان گؤرمک بئله بیر شئ اولمالی :

اونون گؤزلری قارادیر،اورتا بویلودور،یاخشی فیزیک بیلیر.تئز حیرصله‌نر آما محبتلیدیر...آدی سارای دیر."

اونون ساچلاری آچیق رنگلیدیر،اوزونده یئکه بیر ات خالی وار،او چکن معمارلیق طرحینی کیمسه چکه‌نمز.وئردییی سؤزلری توتار آما هردن یالان دا دانیشار ...آدی یاشاردیر."

اینسانلاری جینسلرییله دیرلندیرمک یئرینه فردی فرقلرییله تانیمایی اؤیره‌نسک بلکه ایجتیمادا رادیکال برابرلیک ایستکلرینه یئر قالماز !

هامیمیزچیین چیینه اینسانلیق کؤلگه‌سینده ایله‌شیب ،بیربیریمیزه دانیشان هدیه‌لر وئرن گونو آرزولاماق بلکه چوخدا اوزاق بیر رویا دییلدیر .کیم بیلیر؟!

  سئوگیلریمله...

منبع خبر : راضیه افتخاری
تعداد بازديد : 116
نظرات كاربران :
نام :
ايميل : * 
متن نظر : * 
 
متن بالا را وارد نماييد* 
 
آخرين اخبار
پر بازديد ترين مطالب
صفحه اصلي | نقشه سايت | تماس با ماتمام حقوق مادی و معنوی این سایت متعلق به نويد آذربايجان می باشد و استفاده از مطالب با ذکر منبع بلامانع است.
طراحي سايت و بهينه سازي سايت توسط سارگون